Übersetzung eines Schreibens von: Uwe Kekeritz, MdB
An: Herbert Hainer, Adidas Group
Datiert: 04. Dezember 2014
អ៊ូរើ ខេខឺរីត្ស បាបារ៉ា ឡោះប៊ីលើ
Uwe Kekeritz Barbara Lochbihler
សមាជិកសភាសហព័ន្ធអាល្លឺម៉ង់ សមាជិកសភាអ៊ឺរ៉ុប
Uwe Kekeritz MdB, Platz der Republik 1, 11011 Berlin
Barbara Lochbihler, Rue Wiertz 60, B-1047 Brüssel
ជូនចំពោះលោក
ហ៊ែរប៊ើត ហែន័រ
Herbert Hainer
Adidas Group
Adi-Dassler-Strasse 1
91074 Herzogenaurach
ប៊ែរលីន ថ្ងៃទី៤ធ្នូ ឆ្នាំ២០១៤
កម្មវត្ថុ៖ ភាពពុំគាប់ប្រសើរនៅក្នុងវិស័យឧស្សាហកម្មវាយនភ័ណ្ឌកម្ពុជា
លោក ហែន័រ ជាទីគោរព
តាំងពីខែធ្នូឆ្នាំ២០១៣មក អ្នកដេរនៅតាមរោងចក្រ នៅកម្ពុជាបាននាំគ្នាធ្វើបាតុកម្មទាមទារឲ្យធ្វើការកែលំអចំពោះប្រាក់បៀវត្ស និងលក្ខខណ្ឌការងាររបស់គេ នៅក្នុងវិស័យវាយនភ័ណ្ឌ។ នៅក្នុងសារលិខិតចំហររបស់លោក ជូនចំពោះរដ្ឋាភិបាលកម្ពុជាចុះថ្ងៃទី១៧ ខែមករា ឆ្នាំ២០១៤នោះ លោកបានទាមទារឲ្យរកដំណោះស្រាយទំនាស់ដោយសន្តិវិធី ហើយឲ្យមានការគោរពដល់សហជីព និងឲ្យតម្លើងប្រាក់បៀវត្សជាអប្បរមាជូនដល់កម្មករវាយនភ័ណ្ឌ។ យើងសូមសំដែងការគាំទ្រយ៉ាងជាក់ច្បាស់ចំពោះការខំប្រឹងប្រែងរបស់លោក ហើយក៏ចង់ជួយឧបត្ថម្ភដល់លោក នៅក្នុងរឿងនេះដែរ។
ដោយសារទំនាស់នេះនៅតែបន្តមានមកទល់នឹងសព្វថ្ងៃនេះ យើងសំុសួរលោកថា តើលោកវាយតម្លៃយ៉ាងណាដែរចំពោះផលនៃការអំពាវនាវរបស់លោក ដែលទាក់ទងទៅនឹងសភាពការណ៍របស់កម្មករទាំងនោះ និងតើសារលិខិតរបស់លោកនោះបាននាំមកនូវផលអ្វីខ្លះ? តើលោកមានបានធ្វើការទាក់ទងជាបន្ថែមទៀត ជាមួយនឹងសហជីព ជាមួយម្ចាស់រោងចក្រ និងតំណាងខាងនយោបាយឬទេ? ប្រសិនជាបានធ្វើ តើបានទទួលលទ្ធផលអ្វីខ្លះ? តើក្រុមហ៊ុន Adidas បានដកមេរៀនជាក់ស្តែងអ្វីចេញពីសភាពការណ៍នេះ? ហើយតើលោកជួយឧបត្ថម្ភអ្វីខ្លះដល់កម្មករនៅមូលដ្ឋាននោះ នៅក្នុងការតស៊ូ ដើម្បីបានទទួលប្រាក់បៀវត្ស ដែលអាចធានាការផ្គត់ផ្គង់ជីវិតគេបាននោះ? តើក្រុមហ៊ុនរបស់លោកឥឡូវនេះបង់ប្រាក់បៀវត្សលើសកម្រិតអប្បរមាហើយ ឬយ៉ាងណា ហើយតើលោកបានធ្វើសកម្មភាពអ្វីខ្លះ ដើម្បីជម្រុញអោយអ្នកទទួលកិច្ចការពីលោកគេបង់ប្រាក់បៀវត្សអោយបានខ្ពស់ជាងមុន និងកែលំអរដល់លក្ខខ័ណ្ឌការងារ អោយបានប្រសើជាងមុននោះ? នៅពេលធ្វើកូដកម្មនោះមានអ្នកដឹកនាំសហជីពមួយចំនួនត្រូវគេចាប់ខ្លួន។ តើលោកមានដឹងពីវាសនារបស់សមាជិករបស់សហជីពទាំងនោះទេ និងតើលោកមានបានធ្វើអ្វីជាក់ស្តែងខ្លះ ដើម្បីជួយដល់អ្នកទាំងនោះ?
ប្រទេសនេះស្ថិតក្នុងចំណោមទីតាំងផលិតកម្មធំជាងគេសម្រាប់ក្រុមហ៊ុនលោក។ ដូច្នេះហើយបានជាយើងស្នើសុំអោយលោកប្រើប្រាស់ឋានៈរបស់លោក ជាអ្នកផ្តល់កិច្ចការដ៏សំខាន់នោះ ដើម្បីសម្រេចអោយបាននូវការកែលំអរដល់វិស័យវាយនភ័ណ្ឌនៅកម្ពុជា។
Adidas ជាក្រុមហ៊ុនប្រពៃណីអាល្លឺម៉ង់ ដែលគេស្គាល់តាមរយៈយុទ្ធនាការផ្សាយពាណិជ្ជកម្ម និងយុទ្ធនាការជម្រុញភាពស្វ័យទ្រទ្រង់ធំៗនានា អាចនឹងបំពេញតាមគោលបំណងរបស់ខ្លួនបាននោះ លុះត្រាតែលក្ខខ័ណ្ឌការងារសមរម្យ បទដ្ឋានសង្គមកិច្ច និងបរិស្ថាន ដែលគេអាចទទួលយកបាន ត្រូវបានទទួលការគោរពនៅគ្រប់ទីតាំងផលិតកម្មទាំងអស់របស់ក្រុមហ៊ុន។
ហេតុដូចនេះហើយបានជាយើងសូមអោយលោកបោះជំហានយ៉ាងសកម្មឆ្ពោះទៅរកភាគីរដ្ឋាភិបាល ម្ចាស់សហគ្រាស អ្នកតំណាងកម្មករ និងអង្គការអន្តរជាតិដែលកំពុងធ្វើសកម្មភាពនានា ដើម្បីសម្រេចអោយបាននូវការកែលំអរសភាពការអោយបានប្រសើជាក់ច្បាស់ជាងមុន។
យើងត្រៀមខ្លួនជាស្រេចនឹងធ្វើការពិភាក្សាដោយផ្ទាល់ជាមួយលោក ដើម្បីនិយាយពីបញ្ហានេះ និងពិភាក្សាគ្នាអំពីប្រធានបទដូចបានលើកឡើងមកនេះ។ យើងចង់ដឹងពីចម្លើយតាមលិខិតរបស់លោក ហើយយើងត្រៀមខ្លួនរួចជាស្រេចនឹងធ្វើការណាត់ជួបពិភាក្សាគ្នា ជាមួយនឹងលោកនៅដើមឆ្នាំក្រោយនេះ។
ដោយគោរព
អ៊ូវើ ខេខឺរីត្ស សមាជិកសភាសហព័ន្ធ បាបារ៉ា ឡោះប៊ីលើ សមាជិកសភាអ៊ឺរ៉ុប